Sud Trampning WSJ nashriga 10 milliard dollarlik da’vosini rad etdi
Sudya fikriga ko‘ra, Tramp javobgarlarning «yovuz niyati» borligini ishonchli tarzda isbotlay olmadi.
Florida shtatidagi federal sudya AQSh prezidenti Donald Trampning media magnat Rupert Merdok va The Wall Street Journal (WSJ) nashriga qarshi 10 milliard dollarlik da’vosini rad etdi. Bu haqda CNBC xabar berdi.
Da’vo Trampning moliyachi Jyeffri Epshteynga 50 yoshga to‘lishi munosabati bilan yuborgan behayo maktubi haqidagi maqola bilan bog‘liq edi.
Sudya Darrin Geyls da’voni rad etishga qaror qildi, chunki Tramp javobgarlarning «yovuz niyati» borligini ishonchli tarzda isbotlay olmadi - bu ommaviy shaxs da’vogar bo‘lgan ishlarda majburiy shart hisoblanadi. Shu bilan birga, sud Trampga o‘zgartirilgan da’vo taqdim etishga ruxsat berdi.
Qarorda ta’kidlanishicha, maqola e’lon qilinishidan oldin jurnalistlar Tramp, FTB va Adliya vazirligidan izoh so‘ragan. Prezident Tramp rad javobini bergan, Adliya vazirligi umuman javob bermagan, FTB esa izoh berishdan bosh tortgan.
«Qisqasi, da’vo va maqola javobgarlarning tergov o‘tkazishga harakat qilganini tasdiqlaydi», dedi sudya.
2024 yil iyul oyida sud muhokamasiga sabab bo‘lgan materialda WSJ nashrining yozishicha, Tramp 2003 yilda Epshteynning 50 yoshga to‘lishi munosabati bilan unga behayo suratli maktubni yuborgan.
Tramp bunga izoh berarkan, xat va rasmning muallifligini rad etib, hech qachon bunday matnlarni yozmaganini va rasm chizmaganini aytdi. Shuningdek, u material e’lon qilingan taqdirda nashrni sudga berish bilan tahdid qildi.
2008 yilda moliyachi Jyeffri Epshteyn fohishabozlikni tashkil etishda aybini tan oldi va yengil jazo oldi. 2019 yilda u voyaga yetmaganlar savdosida ayblanib, yana hibsga olindi. Shu yilning avgust oyida moliyachi qamoqxonada o‘z joniga qasd qildi.
