Tramp Tehron bilan muzokaralar to‘xtatilganini rad etdi
AQSh prezidenti Donald Tramp Eronning Vashington bilan muzokaralar to‘xtatilgani haqidagi bayonotlarini rad etdi. Uning ta’kidlashicha, ikki davlat o‘rtasidagi muloqotlar hozir ham faol davom etmoqda.
Tramp 1 iyun kuni Truth Social ijtimoiy tarmog‘idagi sahifasida “Eron Islom Respublikasi bilan muzokaralar tez sur’atlarda davom etmoqda”, deb yozdi.
NBC News telekanali va boshqa ommaviy axborot vositalariga bergan intervyularida AQSh rahbari eronliklar Vashingtonni muzokaralarni to‘xtatish haqida rasman xabardor qilmaganini aytdi.
“Rostini aytsam, biz juda ko‘p gapirdik. Balki sukut saqlash yaxshiroq yechim bo‘lardi”, dedi Tramp.
Uning so‘zlariga ko‘ra, hatto muzokaralar to‘xtatilgan taqdirda ham bu AQShning Eronga qarshi harbiy harakatlarni boshlashini anglatmaydi. Biroq Ho‘rmuz bo‘g‘ozidagi Eron portlariga nisbatan joriy etilgan cheklovlar saqlanib qolishini ta’kidladi.
Bundan avval Eronning Tasnim agentligi AQSh bilan bilvosita muzokaralar to‘xtatilgani haqida xabar bergan edi. Nashrga ko‘ra, Eron tomoni amerikaliklar bilan xabar almashishni vaqtincha to‘xtatgan.
Xabarda bu qaror Isroilning Livandagi “Hizbulloh” obektlariga bergan zarbalari bilan bog‘liq ekani ta’kidlangan.
May oyi oxirida Axios nashri ikki amerikalik manbaga tayanib, AQSh va Eron muzokarachilari fevral oyidan beri davom etayotgan mojaroni tartibga solish bo‘yicha dastlabki kelishuvga yaqinlashganini ma’lum qilgan edi.
Shu bilan birga, Tramp hozircha ehtimoliy kelishuvni qo‘llab-quvvatlamagan. OAV ma’lumotlariga ko‘ra, u Tehron yadroviy qurol yaratish rejalaridan voz kechgan taqdirdagina bitimni ma’qullashi mumkin.
Eron rahbariyati ham AQSh bilan urushni to‘xtatish bo‘yicha yakuniy kelishuvga hali erishilmaganini bildirgan.
