Yaponiya bosh vaziri mamlakatda Amerika yadro qurolini joylashtirish tarafdori ekanini aytdi
Hozir Yaponiya uchta yadroviy davlat – Rossiya, Xitoy va Shimoliy Koreya qurshovida qoldi. Bundan tashqari, AQSh prezidenti Donald Tramp ma’muriyatining ittifoqchilarga nisbatan qarama-qarshi siyosati ko‘proq o‘z kuchlariga tayanish zarurligi haqidagi gap-so‘zlarni keltirib chiqardi.
Yaponiya bosh vaziri Sanae Takaichi 1967 yildagi davlat siyosatining uchta tamoyilini qayta ko‘rib chiqishni rejalashtirmoqda, unga ko‘ra mamlakat yadro quroliga ega bo‘lishi, shuningdek, uni o‘zida ishlab chiqarishi va joylashtirishi mumkin emas, deb yozdi Mainichi.
Tashabbus milliy xavfsizlik bo‘yicha asosiy hujjatlarning yangilanishi fonida paydo bo‘ldi. Xususan, Takaichi yadro qurolini olib kirishni taqiqlashdan voz kechishni taklif qilmoqda, chunki bu AQSh tiyib turuvchi salohiyatini zaiflashtiradi. Hozir Vashington bunday o‘q-dorilarni Yaponiyadagi harbiy bazalarida va uning portlariga kiradigan kemalarida joylashtira olmaydi.
Dastlab, mavzu Takaichi rahbarligidagi hukmron Liberal-demokratik partiya ichida va koalitsiya bo‘yicha hamkorlar bilan muhokama qilinadi. Maslahat keyingi haftada boshlanadi. Agar tomonlar yagona pozitsiyani ishlab chiqishga muvaffaq bo‘lsa, u hukumatga tavsiya sifatida rasmiylashtiriladi, shundan so‘ng yakuniy qarorni bosh vazir qabul qiladi.
Avvalroq Takaichi Yaponiya xavfsizligi AQShga bog‘liq bo‘lsa, unda rasmiylar amaldagi yadroviy cheklovlarni «puxta muhokama qilishi» kerakligini aytgandi.
Yaponiya milliy xavfsizlik strategiyasi oxirgi marta 2022 yil 16 dekabrda yangilangan. Unda mamlakatning ehtimoliy dushman hududidagi nishonlarga qarshi zarba berish huquqi haqida so‘z boradi. Buning uchun mudofaa kuchlarida mavjud bo‘lgan «Tip-12» raketalarining masofasini oshirish, o‘z gipertovushli qurollarini ishlab chiqish va Amerikaning Tomahawk qanotli raketalarini sotib olish rejalashtirilgan. Hujjatda, shuningdek, 2027 yilga borib harbiy xarajatlarni yalpi ichki mahsulotning 2 foizigacha oshirish ko‘zda tutilgan, biroq Takaichi bu maqsadga muddatidan oldin erishishga va’da berdi.
Avgust oyida Yaponiya yadro quroliga egalik qilishi mumkinligi haqida Yaponiya parlamenti deputati, hukmron Liberal-demokratik partiyaning milliy xavfsizlik siyosati bo‘yicha kengashi a’zosi Rui Matsukava ma’lum qildi. Ikkinchi jahon urushi oxirida mamlakat atom bombasi zarbasi oqibatlarini boshdan kechirgandan so‘ng, bu masala taqiqlangan edi. Ammo hozir Yaponiya uchta yadroviy davlat - Rossiya, Xitoy va Shimoliy Koreya qurshovida qoldi. Bundan tashqari, AQSh prezidenti Donald Tramp ma’muriyatining ittifoqchilarga nisbatan qarama-qarshi siyosati ko‘proq o‘z kuchlariga tayanish zarurligi haqidagi gap-so‘zlarni keltirib chiqardi, dedi Matsukava.
