HAMAS o‘z rahbarlaridan biri halok bo‘lganini tasdiqladi
Isroil HAMAS uchun qurol ishlab chiqarishga mas’ul bo‘lgan Rayed Saadning o‘ldirilishi jangchilar hujumiga javob bo‘lganini bildirdi, o‘sha hujum oqibatida Isroilning ikki nafar askari jabr ko‘rgan.
Yevropa Ittifoqi, AQSh va ko‘plab boshqa davlatlar tomonidan terrorchilik tashkiloti deb tan olingan guruh — HAMAS Isroil zarbasi natijasida o‘z rahbarlaridan biri, qurol ishlab chiqarishga mas’ul Rayed Saad halok bo‘lganini tasdiqladi. Bu haqda yakshanba kuni, 14 dekabrda televideniye efirida HAMASning G‘azo sektoridagi rahbari Xalil al-Xayya ma’lum qildi.
U HAMASning qurolga ega bo‘lishi “qonuniy huquq” ekanini ta’kidlab, G‘azo sektoridagi sulh (yarashuv)ning keyingi bosqichi bo‘yicha har qanday taklif ana shu omilni hisobga olishi kerakligini aytdi. “Biz bu huquqni himoya qiladigan va ayni paytda Falastin davlatining tashkil etilishini kafolatlaydigan barcha takliflarga ochiqmiz”, — dedi al-Xayya.
Shu bilan birga, HAMASni qurolsizlantirish AQSh prezidenti Donald Trampning Yaqin Sharqda tinchlik yo‘lidagi rejasidagi asosiy talablardan biri hisoblanadi.
Bir kun oldin Saadning o‘limi haqida Isroil hukumati ma’lum qilib, uni 2023 yil 7 oktyabrda HAMASning Isroilga qarshi keng ko‘lamli hujumining “me’morlaridan biri” deb atagan. Bayonotda “terrorchi Rayed Saadni yo‘q qilish haqida buyruq”ni Isroil bosh vaziri Binyamin Netanyahu va mudofaa vaziri Isroil Kats bergani ko‘rsatilgan. Ular bu HAMAS jangchilari Isroil armiyasiga qarshi, uning nazoratidagi hududda portlovchi qurilmani ishga tushirganiga javob ekanini aytgan.
Bundan oldinroq Isroil Mudofaa armiyasi (TSAHAL) G‘azo sektori janubida “terrorchilik infratuzilmasini yo‘q qilish bo‘yicha operatsiya” vaqtida portlovchi qurilmalar ishga tushishi oqibatida ikki nafar zaxiradagi harbiy xizmatchi yengil yaralanganini bildirgan.
TSAHAL ma’lumotiga ko‘ra, Saad HAMASning qurol ishlab chiqarish markaziga rahbarlik qilgan, ya’ni guruhning harbiy salohiyatini rivojlantirish uning qo‘mondonligi ostida bo‘lgan.
2023 yil 7 oktyabrda HAMASning Isroilga hujumi Yaqin Sharqdagi nizoning keskinlashishi uchun boshlang‘ich nuqta bo‘ldi. O‘shanda jangchilar Isroilga raketa zarbasini berib, uning hududiga bostirib kirgan va taxminan 1200 kishini o‘ldirgan. Shuningdek, ular taxminan 250 nafar garovga olinganlarni tutib, G‘azo sektoriga olib ketgan. Keyinchalik garovga olinganlarning bir qismi almashinuv yoki ozod qilish orqali qaytarilgan, bir qismi esa halok bo‘lgan.
Isroil bunga javoban HAMASga qarshi urush e’lon qildi. G‘azo sektoridagi quruqlik amaliyoti va bombardimonlar natijasida 70 mingdan ortiq falastinlik halok bo‘lgan, 169 mingdan ko‘prog‘i yaralangan.
